Oito grandes empresas tecnolóxicas, entre as que se atopan Apple, Google e Microsoft, pediron hoxe ao presidente de Estados Unidos, Barack Obama, e ao Congreso, un cambio na súa política de vixilancia dixital para que sexa "proporcionada aos riscos, transparente e suxeita a supervisión independente".
Así o expresaron nunha carta conxunta difundida na rede e asinada por Apple, Facebook, Google, LinkedIn, Microsoft, Twitter, Yahoo e AOL, por mor da filtración que o pasado xuño realizou o ex analista da CIA Edward Snowden, que revelou a existencia de programas secretos estadounidenses para recompilar datos telefónicos e dixitais dos cidadáns.
"É tempo de cambiar", aseguran na misiva, na que tamén destacan que as revelacións deste verán "resaltaron a necesidade urxente de reformar as prácticas de vixilancia dos gobernos en todo o mundo". "A balanza en moitos países chegou demasiado lonxe en favor do Estado e separouse dos dereitos das persoas, dereitos que están consagrados na nosa Constitución. Isto debilita as liberdades que todos amamos", engaden.
Así mesmo, os asinantes explican que tratan de protexer a información dos seus usuarios coa "última tecnoloxía de encriptación para previr vixilancia non autorizada" e que frean as peticións do goberno para comprobar que son "legais e razoables". Por todo iso, "urxen" os Estados Unidos a liderar e facer reformas que aseguren que os esforzos de vixilancia estean "claramente restrinxidos pola lei".
Xunto á carta, sete das empresas asinantes (todas excepto Apple) lanzaron un sitio web para estender estas reivindicacións aos gobernos de todo o mundo.
Neste sentido, piden que se limite a autoridade dos gobernos para recompilar información dos usuarios, que rendan contas por ela, que as demandas dos gobernos sexan transparentes, que se respecte o libre fluxo de información e que se eviten conflitos entre gobernos. "Estes principios reformarían o actual sistema para equilibrar axeitadamente as necesidades de seguridade e privacidade, á vez que salvagardarían o dereito fundamental á liberdade de expresión", sinala o conselleiro delegado de Twitter, Dick Costolo.
Para o conselleiro delegado de Google, Larry Page, "a seguridade da información dos usuarios é esencial, que é polo que investimos tanto en encriptación e loitado por que as peticións de información dos gobernos sexan transparentes". "A aparente recompilación de datos a gran escala, en segredo e sen supervisión independente de moitos gobernos en todo o mundo debilita a seguridade dos usuarios", incide Page.
"As informacións sobre a espionaxe do goberno demostraron que hai unha necesidade real dunha maior divulgación de como o goberno solicita información e de que teña novos límites", declara Mark Zuckerberg, conselleiro delegado e fundador de Facebook.
O vicepresidente executivo de Microsoft, Brad Smith, apunta que "a xente non usará unha tecnoloxía na que non confíe. Os gobernos puxeron esta confianza en risco e teñen que axudar a restaurala".
Oito xigantes tecnolóxicos ''urxen'' os EE UU a cambiar as súas políticas de vixilancia na rede
