Obama suspende a polémica festa organizada polo seu 60 aniversario

O expresidente de Estados Unidos Barack Obama (2009-2017) cumpriu este mércores 60 anos, aínda que finalmente optou por dar marcha atrás nos seus plans de organizar unha gran festa a próxima fin de semana e celebrará un evento máis reducido.

Así o confirmou a portavoz do exmandatario Hannah Hankins nun comunicado publicado no diario The Washington Post, no que explicou que se tomou a decisión "debido á nova expansión da variante delta [de coronavirus] na última semana".

Obama tiña previsto celebrar o sábado unha gran festa con famosos nos xardíns da súa mansión na exclusiva illa de Martha's Vineyard (Massachusetts), pero os preparativos ocasionaran algo de polémica polo aumento dos contaxios por covid-19 no país.

O actor George Clooney, o director Steven Spielberg e a presentadora Oprah Winfrey estaban entre as 475 persoas que recibiran invitacións á luxosa celebración, na que ía tocar a banda de rock Pearl Jam e onde todos os invitados debían someterse a un test de covid antes de asistir, segundo medios estadounidenses.

A portavoz de Obama atribúe a suspensión á expansión do variante delta na última semana

Na nota, Hankins indicou que ese evento fora planeado había meses de acordo con todas as recomendacións públicas para protexerse da enfermidade. Con todo, ante o avance do variante delta, "o presidente e a señora Obama decidiron reducir significativamente o evento para incluír só a familia e os amigos próximos", dixo a portavoz.

Hankins agregou que o expresidente "aprecia as felicitacións de aniversario doutras persoas desde a distancia e espera ver a xente pronto".

Algúns comentaristas conservadores acusaran a Obama de hipocrisía por planear esa celebración logo de pedir durante meses aos estadounidenses que se vacinen e sexan coidadosos durante a pandemia.

A portavoz da Casa Branca, Jen Psaki, defendeu o luns a Obama, durante cuxo mandato exerceu como vicepresidente o actual mandatario estadounidense, Joe Biden.

Biden, precisamente, felicitou este mércores o seu antecesor cunha mensaxe en Twitter, na que dixo que está "orgulloso" de chamarlle "irmán e amigo": "E estou agradecido polo seu servizo abnegado a esta nación". O presidente non tiña programado asistir á gran festa, xa cancelada, da fin de semana, aínda que si que planeaba "reunirse pronto" con Obama para "darlle a benvida ao club dos maiores de 60", afirmou un portavoz da Casa Branca a principios desta semana.

Happy birthday, \BarackObamaI'm proud to call you a brother and a friend — and I'm grateful for your selfless service to this nation. pic.twitter.com/jZ9XnX2Dxt<> — President Biden (\POTUS) August 4, 2021<>