Un bebé prematuro de tan só dous días de vida faleceu a causa do coronavirus en Sudáfrica, de acordo cos últimos datos oficiais, o que supón unha das mortes máis temperás rexistradas neste país. Os datos, facilitados polo Goberno indican que a nai e o bebé dera positivo nas probas do novo coronavirus.
"Desgraciadamente rexistramos o primeiro falecemento neonatal relacionado co Covid-19. O bebé tiña 2 días e naceu prematuramente. O bebé tiña dificultades pulmonares que requiriron apoio por ventilación (pulmonar) inmediatamente despois do seu nacemento", lamentou o Ministerio de Saúde sudafricano, nun comunicado difundido a última hora do mércores, onde anunciaron 26 novas mortes.
No caso deste bebé sudafricano, os problemas expostos pola enfermidade víanse acrecentados pola súa condición prematura.
Sudáfrica, con 18.003 casos e 339 falecidos, é o país máis golpeado pola pandemia de toda África, onde hai case 95.000 casos, con menos de 3.000 mortos.
A pesar das duras medidas de confinamento impostas de forma temperá, a lenta desescalada actual e a estratexia de saír a facer test masivos, Sudáfrica está a experimentar esta semana unha aceleración da epidemia, con cifras próximas ao milleiro de casos novos cada día que se concentran sobre todo na rexión do Cabo Occidental (onde se atopa Cidade do Cabo).
En xeral, África non está a vivir os aumentos explosivos dos contaxios que se viron en Europa e Estados Unidos, grazas en gran medida ás reaccións rápidas e drásticas da maior parte de países do continente, sabedores da fraxilidade dos seus sistemas de saúde.
