No día no que o Congreso de EE UU aprobou un proxecto de lei con 1.000 millóns de dólares para as novas autoridades de Ucraína e sancións a Rusia, o que realmente está alborotando o país é a folga sexual que as ucraínas veñen de declarar aos rusos.
A revolución, que causa furor na rede social Facebook, xa foi considerada como unha sanción moito máis efectiva que a económica.
"¡Non te deas a un ruso!", reza a lema da campaña lanzada por unhas activistas ucraínas, que intentan castigar desa forma a aqueles rusos que apoian a política imperialista do xefe do Kremlin, Vladímir Putin.
A campaña virtual está acompañada pola venda de camisetas co xa famoso lema a favor da abstinencia sexual contra os rusos e dúas mans dando forma ao que parece unha vaxina.
"O obxectivo da campaña non é insultar os rusos, senón cunha idea provocativa chamar a atención sobre os excesos cometidos polos rusos en Crimea, secuestrando xente, torturando reféns, pisando os dereitos dos tártaros ou dificultando o traballo da prensa", aseguran as organizadoras na súa conta de Facebook.
Moitos ucraínos apoiaron a campaña, xa que consideran que as sancións adoptadas por Occidente non inquietan a Putin, polo que hai que recorrer ao enxeño.
"Mozas, como lles vai a amolar isto. Incluso me podo imaxinar as súas babas no computador", "Namorádevos dos de cellas escuras, pero non dos moscovitas", "Son ruso, pero condeno o réxime de Putin ¿Podo gozar dun contacto sexual cunha patriota ucraína?" ou "¿Onde se poden comprar esas camisetas? Quero unha", son algunhas das frases que circulan pola rede.
As activistas seguen a senda provocadora marcada polo grupo Femen, que se fixo famoso en todo o mundo por espirse nos lugares máis insospeitados.
"Non lle deas aos rusos Crimea, non lles deixes anexionarse o teu territorio, non lles deas diñeiro, non os deixes vencer. O sexo, por gracioso que pareza, é o último que se lle ocorrería á xente", sinalan as autoras da iniciativa.
Non todos se tomaron a campaña con bo humor, especialmente os usuarios rusos que son os que poñen pegas á idea.
"Se só se entregan aos ucraínos, entón moitas mulleres quedarán insatisfeitas" ou "O importante é instigar o odio entre os pobos eslavos", sinalan.
Incluso o opositor ruso Borís Nemtsov, un dos máis críticos con Putin, considera que as sancións sexuais non son a resposta adecuada para castigar o Kremlin, senón a conxelación de contas dos oligarcas rusos.
"Mulleres rusas, ¿non queredes sumarvos? Os nosos aínda están en casa, pero os vosos xa foron á guerra", proclaman as activistas.
