Lagarde asegura que a crise dos refuxiados ameaza Schengen

A directora xerente do Fondo Monetario Internacional (FMI), Christine Lagarde, dixo este sábado que a crise de refuxiados en Europa chegou a un punto no que debe ser resolto ou pode ameazar a continuidade de Schengen.

Nunha intervención no Foro Económico Mundial de Davos, Lagarde insistiu en que a crise de refuxiados constitúe un risco concreto para a supervivencia do espazo Schengen.

Con todo, tamén recordou que análises da entidade que dirixe indican que se os países puxesen en marcha sistemas de integración apropiados, este fenómeno migratorio e de refuxiados xeraría no curto e mediano prazo un crecemento adicional de 1,2 puntos porcentuais para a Eurozona.

Schengen é un acordo referido á libre circulación de persoas entre os países europeos asinantes.

Lagarde comentou que, ademais desa problemática, o outro reto máis urxente que debe superar a Unión Europea é conducir a un bo resultado as negociacións co Reino Unido para previr a súa eventual saída do bloque comunitario.

Sostivo que tal acordo "daría máis estabilidade e cohesión á Eurozona".

Sobre as inquietudes xeradas polas recentes previsións económicas, a titular do FMI recordou, que aínda que o crecemento será "modesto e desigual", cunha taxa proxectada do 3,4 por cento este ano, non debe esquecerse que é maior ao 3,1 por cento de 2015 e que a progresión continuará en 2017 ata o 3,6 por cento.

"Estamos a mellorar o valor global das nosas economías", salientou.

O Foro Económico Mundial de Davos concluíu este sábado nesa localidade suíza coa análise das perspectivas económicas globais para os próximos meses.