O Consello de Seguridade da Onu condenou o ensaio nuclear realizado este mércores por Corea do Norte e anunciou que traballará "inmediatamente" para adoptar unha nova resolución de condena.
O anuncio foi feito polo embaixador de Uruguai na Onu, Elbio Rosselli, cuxo país preside o Consello este mes, nunha declaración que leu aos xornalistas ao final dunha reunión de urxencia realizada este mércores por ese órgano de Nacións Unidas.
A proba nuclear norcoreana é "unha clara ameaza á paz e a seguridade" internacional e unha "clara violación" ás resolucións da Onu que esixen ao réxime de Pyongyang o final desas probas.
A declaración recorda que noutras ocasións ameazaran con adoptar novas "medidas significativas" no caso de que Pyongyang continuase con esas probas nucleares.
A partir do ensaio deste mércores, Rosselli dixo que os membros do consello traballarán "inmediatamente" para adoptar unha nova resolución nese sentido, sen precisar detalles sobre se haberá unha ampliación das sancións xa existentes.
Desde 2006 a Onu sancionou a Corea do Norte polos ensaios nucleares realizados ata a data (o deste mércores é o cuarto que se coñeza) e polo programa de mísiles balísticos que desenvolve.
Tras a súa reunión deste mércores, segundo a declaración difundida ao final, o Consello cre que o ensaio non só é unha violación ás resolucións da ONU senón tamén ao réxime de non proliferación nuclear que está a buscar a comunidade internacional.
Estados Unidos cuestino o éxito da proba
A Onu traballa xa nunha resolución de condena para Corea do Norte
Estados Unidos pon en dúbida o "éxito" do ensaio nuclear
