A Oficina de Coordinación de Asuntos Humanitarios de Nacións Unidas (OCHA) anunciou este martes que todas as operacións humanitarias en Siria "quedan suspendidas" tras o ataque contra un convoi humanitario este luns na rexión de Alepo. "Por agora non temos unha visión global do que pasou, pero tomouse a decisión de que todas as operacións humanitarias de convois sobre o terreo quedan suspendidas polo momento", afirmou nunha rolda de prensa o portavoz da OCHA, Jens Laerke.
Un convoi humanitario de Nacións Unidas pero xestionado pola Cruz Vermella foi atacado este luns na rexión de Alepo e morreron ao redor de 20 persoas, segundo os últimos datos. "Este é un día moi negro para a comunidade humanitaria", afirmou Laerke.
O portavoz tamén indicou que o xefe humanitario da Onu, Stephen O'Brien, condenou o ataque e mostrouse "espantado" polo ocorrido. O'Brien, así mesmo, subliñou que pode constituír un crime de guerra.
Laerke puntualizou, ademais, que o convoi tiña a autorización das autoridades para cruzar o territorio e distribuír a asistencia humanitaria, que todas as partes belixerantes estaban informadas da súa traxectoria, e que estaba claramente marcado como humanitario. "Non hai ningunha explicación ou escusa, ningunha razón ou racionalidade que explique o ataque a traballadores humanitarios que intentan axudar a cidadáns que necesitan axuda de forma desesperada", concluíu O'Brien.
Os camións transportaban axuda de primeira necesidade para 78.000 persoas que sobreviven na zona de Auram al Kubra, no oeste da provincia setentrional siria de Alepo, que non recibira asistencia desde xullo.
SIRIA E RUSIA NEGAN A SÚA IMPLICACIÓN. As autoridades sirias aseguraron este martes que o Exército nacional non bombardeou o convoi de axuda humanitaria na localidade de Auram al Kubra.
Fonte militares, citadas pola axencia de noticias oficial SA, sinalaron que "non son verdade as noticias dalgúns medios de comunicación de que o Exército Árabe Sirio atacou un convoi de axuda humanitaria en Alepo".
Nin a aviación rusa nin a siria son responsables do ataque aéreo que sufriu onte un convoi humanitario da Onu na cidade siria de Alepo, reiterou tamén o portavoz do Ministerio de Defensa de Rusia, Ígor Konáshenkov.
