A Corte de Casación francesa, máxima instancia xudicial, confirmou este venres que a directora xerente do Fondo Monetario Internacional (FMI), Christine Lagarde, deberá sentar no banco pola súa presunta neglixencia na xestión de fondos públicos nunha indemnización ao empresario Bernard Tapie.
Lagarde estivo supostamente implicada, cando era ministra de Economía, na arbitraxe privada que concedeu unha indemnización millonaria a Tapie pola venda do grupo de material deportivo Adidas, que lle foi expropiado ao magnate.
A arbitraxe decidiu resarcir con 404 millóns de euros ao expolítico e empresario pola plusvalía, na súa opinión esaxerada, que o Estado obtivo en 1994 coa venda de Adidas, a través do banco Crédit Lyonnais.
Os xuíces da Corte de Xustiza da República (CJR, encargada de xulgar os delitos cometidos por membros do Goberno no exercicio das súas funcións) acusaron á entón titular de Economía de dar, en outubro de 2007, instrucións para aceptar unha arbitraxe privada e esquivar así o proceso da xustiza ordinaria.
A Corte de Casación decidiu o pasado 30 de xuño a anulación desa arbitraxe de acordo co Tribunal de Apelación de París, que en febreiro de 2015 estimara que foi un "simulacro" fraudulento en favor do tamén actor e exministro socialista.
Un día despois, a Fiscalía pediu a Casación que rexeitase o recurso presentado por Lagarde contra o seu envío a xuízo, como así fixo finalmente.
A Corte de Casación francesa confirma que Lagarde deberá ir a xuízo
A directora xerente do FMI sentará no banco pola súa presunta neglixencia na xestión de fondos públicos nunha indemnización ao empresario Bernard Tapie
