As oficinas do semanario satírico Charlie Hebdo foron incendiadas onte á noite con cócteles molotov despois de que o xornal publicase un número sobre a vitoria dos islamitas nas eleccións celebradas en Tunisia, informaron fontes policiais.
O incendio, que non deixou ningún ferido, comezou cara á 01.00 da madrugada, hora de París, no número 62 de boulevard Davout, indicou a emisora 'France Info', que sinalou que a páxina web de Charlie Hebdo tamén foi atacada por piratas informáticos.
O último número do semanario que se publica os mércores, cuxa portada xa fora avanzada, cambia o nome do xornal polo de "Charia Hebdo", en referencia á lei islámica, e coloca ao profeta Mahoma como redactor xefe para "celebrar a vitoria" do partido islamita Ennahda en Tunisia.
Durante parte da noite, unha mensaxe en inglés e en turco na web denunciaba a utilización da figura de Mahoma "con caricaturas groseiras e vergoñosas baixo o pretexto da liberdade de expresión".
Segundo os responsables da revista que dirixe Charb, o ataque está directamente relacionado coa publicación deste último número, que provocara xa insultos e ameazas vía Twitter ou Facebook.
PRECEDENTES
Non é a primeira vez que Charlie Hebdo, que se edita desde 1970 e actualmente distribúe uns 50.000 exemplares por semana, ten problemas por un asunto similar.
En 2006, tras reproducir as caricaturas de Mahoma do xornal danés Jyllands-Posten que provocaron a ira dos islamitas radicais en varios países, o xornal recibiu ameazas e chegou a ser denunciado por inxurias con base relixiosa.
A publicación, que entón dirixía Philippe Val, foi absolta en primeira e segunda instancia, ao considerarse que as caricaturas de Charlie Hebdo non atacaban ao islam senón aos integristas.
Aínda que as maquetas e abundante material da revista resultou destruído durante o ataque desta noite, o semanario sairá normalmente esta semana xa que o último número xa saíra cara aos quioscos cando se produciu o ataque, asegurou o director da revista.
"Somos indixentes e xa non temos con que facer o xornal. Espero que (Charia Hebdo) non será o"último , declarou Charb a "Europe 1", que precisou que aínda que o semanario xógase a súa supervivencia, "en principio non lles deixará terreo aos islamitas".
Segundo os medios galos, aínda non se produciron detencións relacionadas co ataque.
Incendian a sede da revista satírica Charlie Hebdo tras publicar un número sobre as eleccións en Tunisia
