O Parlamento húngaro aprobou este martes cos votos do partido gobernante Fidesz, do ultranacionalista Viktor Orbán, unha polémica normativa que, entre outros aspectos, prohibe falar sobre homosexualidade nos programas escolares e que foi cualificada de homófoba pola oposición progresista. Esas medidas incluíronse dentro dun proxecto de lei contra a pedofilia no que se prohibe expor a menores de 18 anos a pornografía e a calquera contido que fomente o cambio de sexo e a homosexualidade.
Segundo a oposición progresista, colectivos de defensa dos dereitos LGTB+ e a prensa que non está controlada polo Goberno, a lei aprobada é especialmente daniña porque equipara a homosexualidade coa pedofilia. Os partidos da oposición de esquerda, entre eles os socialistas, a formación Párbeszéd (Diálogo), a Coalición Democrática e os ecoloxistas do LMP, decidiron non participar na votación, mentres que a formación opositora de dereitas Jobbik apoiou a normativa.
Deste xeito, Orbán logrou tamén dividir á oposición, que decidiu unirse —desde a esquerda ata o dereitista Jobbik— nunha única candidatura electoral para as eleccións de 2022 co obxectivo de desaloxar ao primeiro ministro do poder.
Miles de persoas protestaron este luns na praza Kossuth, onde se atopa o Parlamento, contra a aprobación desta polémica lei que tacharon de homófoba e "daniña".
Segundo a canle privada RTL Klub, a aprobación da lei suporá que películas xuvenís como Harry Potter, nas que se tratan asuntos como a identidade sexual, deberían ser recomendadas só para maiores de 18 anos.
A semana pasada varios ONG criticaron o proxecto de lei, ao asegurar que a lexislación "non ten precedentes na Unión Europea (UE)" e pon en perigo a saúde mental dos mozos LGTB+.
Organizacións como a Asociación Háttér, de defensa dos dereitos homosexuais, Amnistía Internacional ou Budapest Pride recordaron que esta lexislación é moi parecida á que Rusia aprobou en 2013 sobre a "propaganda gai", e que levou un aumento da homofobia nese país.
Desde que chegou ao poder en 2010, o Goberno de Orbán adoptou unha serie de leis que limitan os dereitos LGTB+ e varios políticos lanzaron publicamente mensaxes homófobos. Xa na Constitución de 2011, aprobada en solitario polo partido de Orbán, determinouse que o matrimonio era a unión dun home e unha muller.
O presidente do Parlamento e un dos fundadores do Fidesz, László Kövér, comparou aos homosexuais que queren adoptar con pedófilos. "Hungría é un país tolerante e paciente coa homosexualidade, sempre que deixen en paz aos nosos fillos", afirmou no seu día Orbán, pouco antes de que se prohibise a adopción por parte de parellas do mesmo sexo.
O ano pasado, un libro para nenos titulado O país das marabillas é para todos, que buscaba mostrar respecto cara ás minorías, foi descrito polo Goberno como "propaganda homosexual" que debería prohibirse nas escolas. Durante a pandemia, en maio de 2020, o Goberno prohibiu cambiar de nome a transexuais.
