Ao redor de 300.000 gregos maiores de 60 anos veranse obrigados a pagar unha multa de 50 euros por non vacinarse, xa que este luns venceu o prazo que o Goberno do conservador Kyriakos Mitsotakis dera en novembro a este grupo de idade para que se inocule contra o coronavirus. A multa será só de 50 euros para xaneiro, xa que a medida entrou en vigor a mediados do mes, pero a partir de febreiro, os maiores de 60 anos que sigan sen porse a inxección pagarán unha multa de 100 euros por cada mes que pasen sen recibila.
Mitsotakis anunciara esta medida o 30 de novembro, no medio dunha escalada de contagios e un aumento na presión hospitalaria. O primeiro ministro heleno xustificou entón a imposición da obrigatoriedade de vacinación aos maiores de 60 anos polo feito de que a maior parte que necesita tratamento hospitalario son persoas non vacinadas desta franxa de idade. Segundo os expertos, a vacinación dunha persoa de 70 anos equivale a 34 vacinacións de xente máis nova no que afecta á sanidade pública.
O 30 de novembro, cando a medida foi anunciada, un 17% dos gregos maiores de 60 anos permanecía sen recibir a vacina, ao redor de 520.000 persoas. Actualmente son o 10%, uns 300.000 gregos desta franxa de idade, o que significa que desde que o Goberno anunciou a obrigatoriedade ao redor de 220.000 maiores de 60 anos foron a vacinarse.
As multas serán impostas pola autoridade independente encargada dos ingresos públicos (AADE segundo as súas siglas gregas) e o diñeiro recolleito destinarase a unha conta especial para apoiar a sanidade pública.
O próximo 1 de febreiro entra en vigor outra medida segundo a cal o pasaporte covid grego caducará aos sete meses —e non aos nove como sucede co pasaporte covid europeo— se non se puxo unha vacina de reforzo. Esta norma, que ata agora tan só aplicábase aos maiores de 60 anos, pretende reforzar a inmunidade de toda a poboación, xa que se aplicará a todos os maiores de 18 anos.
Actualmente, ao redor do 95% dos casos de covid en Grecia son da variante ómicron e os expertos esperan que para finais de mes a situación de contagios mellorará sensiblemente.
A taxa de vacinación entre os gregos permanece baixo a media europea, co 67% da poboación coa pauta completa e o 40% a inxección de reforzo.
