Un agricultor belga da localidade de Erquelinnes, que moveu unha pedra de 150 quilos para agrandar o seu terreo e pasar co seu tractor, desprazou accidentalmente a fronteira entre Bélxica e Francia en 2,29 metros.
O labriego dese municipio do sur de Bélxica que toca co norte de Francia modificou así unha fronteira delimitada polo Tratado de Courtrai de 1820 e agrandou o territorio belga, en beneficio do seu pobo e en detrimento do francés Bousignies-sur-Roc.
A alteración na cartografía foi descuberta por un grupo de afeccionados á Historia, Jean-Pierre Chopin, Philippe Fayt e Jean-Paul Maieu, cando percorrían o lugar con mapas da época.
A pedra en cuestión, gravada coa data de 1819, establece como quedo rexistrada esa fronteira tras a derrota de Napoleón en 1815 na localidade belga de Waterloo, antes da formación de Bélxica como Estado en 1830.
Segundo o relato dalgúns veciños a medios franceses, o agricultor en cuestión desprazaría a pedra para agrandar lixeiramente o seu terreo, mentres que outros medios indican que o granxeiro moveu a roca para poder manobrar mellor co seu tractor.
"Moveuse o límite de 1819, amplíase Bélxica e o noso municipio. Os franceses obviamente non están de acordo, teremos que volver pór as cousas no seu sitio", escribiu o Facebook o alcalde do municipio belga de Erquelinnes, David Lavaux, que se desprazou ata o punto en discordia cun equipo da televisión francesa TF1.
As autoridades belgas contactarán co granxeiro para pedirlle que volva pór a pedra no seu sitio e evitar que Bruxelas incorra nun conflito fronteirizo co país veciño e que o agricultor teña que responder ante un tribunal penal.
"Pero se mostra boas intencións non terá ningún problema, solucionaremos isto de xeito amigable", declarou o alcalde ao diario local Sudinfo.
Lavaux explicou a Efe que cre que o propietario moveu a roca para gañar algo de terreo e explicou que os responsables municipais manterán unha reunión con el para solicitarlle que devolva o poste ao seu lugar orixinal, porque "non é só un fito entre dous veciños, senón que delimita dous países", aínda que os veciños trasfronterizos tomáronllo "con humor".
"Non reducimos demasiado Francia", agregou Lavaux, quen espera que para o fin de semana Bélxica e Francia recuperen as súas dimensións orixinais.