O primeiro ministro de Portugal, António Costa, anunciou este xoves que as fronteiras terrestres con España seguirán pechadas ata que pase a Semana Santa para evitar os habituais desprazamentos durante ese período vacacional.
Costa explicou que a pesar de que a situación da pandemia de coronavirus a ambos os dous lados da fronteira mellorou e podería permitir a súa apertura, optouse por manter o peche ata logo de Pascua, e "por acordo con España"
O primeiro ministro luso confirmou o peche fronteirizo durante a presentación do plan de desconfinamento de Portugal, que permitirá a reapertura gradual dun país moi afectado pola terceira onda da pandemia, o que o levou a limitar a circulación con España.
As fronteiras terrestres entre os dous países ibéricos están restrinxidas desde o 31 de xaneiro e só se permite cruzar en casos moi excepcionais, como transporte de mercancías, traballadores transfronteirizos ou o regreso de nacionais.
Ademais, só se pode cruzar polos pasos autorizados de norte a sur da fronteira, algúns abertos 24 horas e outros con limitacións de horarios.
Desde que comezou a pandemia, oficialmente hai agora un ano, Portugal, con dez millóns de habitantes, acumula 16.635 mortes e 812.575 contagios de coronavirus.