O palestino máis ancián foi enterrado este mércores na franxa de Gaza tras falecer este martes aos 128 anos de idade, informaron fontes familiares e do Ministerio de Sanidade.
Rajab al-Toom nacera na cidade de Beer Sheva (actualmente en territorio de Israel) en 1888 e viuse forzado a abandonar o seu fogar en 1948 por mor da fundación do Estado xudeu e o consecuente problema dos refuxiados que ocasionou a Primeira Guerra Árabe-Israelí.
Al-Toom, que pasou a vivir no campo de refuxiados de Yabalia, na franxa de Gaza, faleceu o martes, informaron os seus netos, quen aseguran que se trataba do palestino máis ancián.
Como tal, fora testemuña dos principais acontecementos políticos na rexión desde o Imperio Otomán, pasando pola Primeira Guerra Mundial, o Mandato Británico, a Segunda Guerra Mundial e a ocupación militar israelí de Cisxordania e Gaza.
Fontes da familia informaron de que Al-Toom abandonou Beer Sheva coa súa muller e oito fillos e que ao falecer tiña xa 350 netos.
Un deles, Mohamed Al-Toom, dixo que o seu avó seguía tendo ata o último día os vellos documentos de propiedade da súa casa e terras.
"O meu avó morreu co soño de ver concretado o dereito de retorno para os refuxiados, un dereito lexítimo que ninguén pode esquecer", dixo Mohamed.
O falecido, enterrado nun cemiterio do norte da franxa, si alcanzou a ver un escintileo de paz cando en 1994 foi testemuña do regreso a Gaza do histórico líder palestino Yaser Arafat (falecido en novembro de 2004) e a creación da Autoridade Nacional Palestina, aínda que tamén o fracaso do proceso de Oslo e a toma da franxa polo movemento islamita Hamás, en xuño de 2007.
Falece o palestino máis vello, de 128 anos de idade
Rajab al-Toom naceu en 1888 e foi testemuña dos principais acontecementos políticos na rexión, desde o Imperio Otomán ata a ocupación militar israelí de Cisxordania e Gaza
