Polo menos unha persoa morreu este martes como consecuencia dun tiroteo ocorrido no aeroporto Will Rogers World (WRWA) de Oklahoma City, en Estados Unidos, o que provocou o peche das instalacións. "Podemos confirmar que a vítima está morta", indicou o Departamento de Policía na súa conta oficial de Twitter. Trátase de Michael Winchester, un empregado da aerolínea Southwest Airlines que resultou ferido nun principio, pero morreu despois nun hospital.
"O aeroporto está aínda pechado mentres continúa a investigación", agregou o corpo policial, ao precisar que "todos os voos de entrada e saída foron suspendidos". O tiroteo ocorreu no exterior dun estacionamento pouco despois do mediodía e a Policía busca ao autor dos disparos nas instalacións aeroportuarias.
As forzas da orde recibiron información sobre unha segunda vítima, pero descartaron tal extremo. Segundo a cadea de televisión local KOKH-TV, efectivos da FBI e unha unidade de desactivación de explosivos examinaron os vehículos que estaban estacionados sen achar, de momento, nada sospeitoso.
O Will Rogers World é o aeroporto de maior tráfico do estado de Oklahoma, con preto de catro millóns de pasaxeiros ao ano, e atópase a uns oito quilómetros da cidade homónima.
Falece un traballador nun tiroteo no aeroporto de Oklahoma que obrigou a pechar as instalacións
A vítima é un empregado da aerolínea Southwest Airlines que foi trasladado con vida ao hospital, pero faleceu pouco despois ► A Policía busca ao autor dos disparos
