Un vehículo chocou este martes contra a fachada da sede do diario holandés De Telegraaf en Ámsterdam nun acto que o xornal e a policía consideran un ataque deliberado e que non deixou vítimas, informou o rotativo.
O suceso produciuse ás 04.00 da madrugada hora local (02.00 horas GMT) cando un vehículo monovolume arremeteu a gran velocidade contra a fachada acristalada do edificio e posteriormente incendiouse.
O atacante fuxiu nun coche conducido por outra persoa, segundo a policía, que considera que se tratou dun "ataque dirixido" contra o xornal.
Os bombeiros apagaron rapidamente o lume, cuxas chamas chegaron a alcanzar os 14 metros de altura e causou considerables danos materiais. "Todo apunta a que había unha intención e, na miña opinión, trátase dun ataque. Non nos deixaremos intimidar" , dixo o redactor xefe do diario, Paul Jansen, nun comunicado publicado na portada da versión dixital de De Telegraaf, no que di que ata que non se coñeza a autoría do acto non se pode determinar que mensaxe se quería enviar.