Estados Unidos prepárase para recibir hoxe ao furacán Irene que se prevé que toque terra en Carolina do Norte con ventos de máis de 150 quilómetros por hora e deixe ao seu paso unha acumulación de ata 40 centímetros de auga nalgunhas zonas da costa este. O presidente estadounidense, Barack Obama, decretou o estado de urxencia en Carolina do Norte, Nova York, Virginia e Massachusetts, por onde se prevé que pase o furacán nas próximas horas.
As autoridades estadounidenses levan días organizando os plans de urxencia ante as posibles inundacións e cortes de luz que poida causar Irene. A secretaria de Seguridade Nacional, Janet Napolitano; o administrador da Axencia Federal para a Xestión de Urxencias (FEMA), Craig Fugate, e o presidente de Cruz Vermella en Estados Unidos, Gail McGovern, seguirán a evolución do furacán desde o cuartel xeral do FEMA en Washington. Está previsto que ofrezan unha rolda de prensa conxunta ás 11.00 hora local (15.00 GMT) na que analizarán a resposta dos equipos de urxencia e avaliarán os posibles danos que cause o furacán tras impactar na terra.
O alcalde de Nova York, Michael Bloomberg, ordenou a evacuación dunhas 250.000 persoas que viven nas áreas situadas por baixo do nivel do mar. Outras cidades costeiras como a turística Ocean City, en Maryland, tamén recibiu o mandato de evacuación.
O venres Fugate pediu aos cidadáns que atendan ás peticións das autoridades e abandone as zonas na diana do furacán porque, pola contra, "todas as preparacións e planificacións (de urxencia) serán en balde".
Mentres tanto os cidadáns prepáranse ante a posibilidade de quedar sen luz, auga e comestibles nos próximos días e acudiron a abastecerse aos supermercados, onde se acumularon grandes colas e nalgúns comezaron a esgotarse as existencias.
