O Ministerio español de Asuntos Exteriores desaconsella aos cidadáns viaxar a Serra Leona, Liberia e Guinea Conakry, salvo por razóns de extrema necesidade, ante o brote de ébola que azouta a África Occidental.
O citado departamento actualizou as recomendacións que difunde a través da súa páxina web (www.maec.es) ante este brote de ébola que se cobrou xa a vida de máis de 720 persoas en catro meses.
Guinea Conakry, Liberia e Serra Leona illarán as zonas transfronteirizas onde se concentra o 70 % dos casos de ébola e poderán restrinxir a circulación de persoas, segundo un comunicado oficial difundido hoxe pola prensa local.
Esa é unha das medidas que os xefes de Estado e de Goberno da Unión do Río Mano (que integra a Serra Leona, Liberia, Guinea e Costa de Marfil) e a Organización Mundial da Saúde (OMS) acordaron onte no cume celebrado en Conakry para coordinar a súa estratexia contra o ébola.
O Ministerio de Exteriores de España desaconsella así viaxar a Serra Leona e aprazar ese desprazamento e, en caso de absoluta necesidade, recomenda evitar determinadas zonas.
Desaconséllase todo tipo de desprazamentos, incluíndo Freetown, a capital, e moi especialmente as zonas fronteirizas de Serra Leona e Guinea-Conakry, así como Serra Leona e Liberia, especialmente aos distritos de Kailahum, Kenema e Freetown.
Tamén se recomenda respectar as normas elementais de hixiene, absterse de consumir carne de caza e evitar os lugares e eventos nos que haxa grandes concentracións de poboación.
O ministerio tamén desaconsella viaxar, salvo por razóns de extrema necesidade, a Liberia por ese mesmo brote de ébola.
A Embaixada de España desaconsella firmemente todo tipo de desprazamento a calquera parte de Liberia e, moi especialmente, aos condados de Montserrado (Monrovia), Margibi (Aeroporto Internacional de Robertsfield), Lofa, Bong, Bomi, Nimba, Grand Cape Mountain, Grand Gedeh e Gbarpolu e Grand Bassa.
Ademais, Cruz Vermella Española vai enviar a Serra Leona a súa Unidade de Resposta de Urxencias, con trece delegados especializados en saúde e loxística.
O Ministerio español de Sanidade, xunto cos gobernos rexionais e o Instituto Carlos III de Madrid, informou onte de que se están implementando as medidas necesarias para controlar o risco, que se considera "pequeno", de que algún afectado polo virus do ébola poida chegar a España.
