As autoridades rusas detiveron este luns a un dos presuntos organizadores do atentado suicida do pasado 3 de abril contra o metro de San Petersburgo, no que morreron 14 persoas. Segundo o Servizo Federal de Seguridade (FSB, antigo KGB), trátase de Abror Azímov, de 27 anos e oriúndo de Asia central, quen adestraría ao terrorista suicida, Akbarzhon Dzhalílov, nacido en Kirguizistán.
Azímov, que foi detido nunha localidade da rexión de Moscova, portaba unha pistola cargada e un teléfono móbil cando foi apresado polas forzas de seguridade, segundo informan medios locais. No vídeo divulgado polo FSB pódese ver como varios axentes se abalanzan sobre o sospeitoso a escasos metros dunha vía do tren.
O suposto organizador, que dixo coñecer o motivo da súa detención, foi trasladado á sede do Comité de Instrución de Rusia para o seu interrogatorio. As autoridades detiveron nas últimas dúas semanas a varios cidadáns procedentes de países de Asia central, na súa maioría en San Petersburgo, como sospeitosos de colaborar co Estado Islámico (EI) e outras organizacións terroristas.
Segundo os medios rusos, varios achegados de Dzhalílov combateron en Siria no bando xihadista, pero as autoridades rusas aínda non confirmaron que sexa o EI o que estea detrás do atentado suicida.
Dzhalílov, de 22 anos, naceu en Kirguizistán, pero recibiu en 2011 a cidadanía rusa e residía desde entón na antiga capital zarista.
O presidente ruso, Vladímir Putin, admitiu que a situación na loita contra o terrorismo non mellorou, aducindo que a mellor constatación é o atentado contra o metro da súa cidade natal. Rusia non sufría un atentado desa magnitude no seu territorio desde decembro de 2013, cando dous suicidas mataron a 34 persoas nunha estación de tren e un trolebús en Volgogrado, antiga Stalingrado.
Detido o presunto organizador do ataque no metro de San Petersburgo
Trátase de Abror Azímov, de 27 anos e oriúndo de Asia central, quen adestraría ao terrorista suicida, Akbarzhon Dzhalílov, nacido en Kirguizistán
