Un home tivo que ser hospitalizado en Suecia tras ser mordido nun acuario de Estocolmo por un crocodilo que pertenceu no seu día ao expresidente de Cuba Fidel Castro, segundo informaron este mércores medios suecos.
O home, de 75 anos, atopábase nunha festa privada no acuario do popular museo ao aire libre de Skansen, cando por descoido abriu co brazo o cristal de seguridade e foi mordido nesa extremidade polo animal.
O acuario posúe dous crocodilos cubanos, de nome Castro e Hillary, unha rara especie da que só hai algúns centenares no país caribeño e nalgúns zoolóxicos no estranxeiro. Segundo relatou ao diario 'Svenska Dagbladet' o director do acuario, Jonas Wahlström, os crocodilos foron entregados persoalmente como un agasallo de Castro a un cosmonauta ruso, cando este estaba de visita en Cuba en 1978. O cosmonauta cedeunos logo ao zoológico de Moscova, que en 1981 llos ofreceu a Wahlström, xa que o acuario de Skansen tiña mellores instalacións para albergar aos animais.
O acuario informou de que se reforzaron as medidas de seguridade para evitar que se repita o incidente, pero non revelou cal dos dous crocodilos foi o agresor.
