Nunha esperada rolda de prensa, cuxo inicio se atrasou case dúas horas, o xefe da misión internacional de expertos da OMS, o especialista en zoonosis danés Peter Ben Embarek, considerou "extremadamente improbable" que o virus se escapase dun laboratorio, tal como sostivo reiteradamente a anterior Administración de Donald Trump en Estados Unidos.
Embarek argumentou que antes da aparición do virus "ningunha publicación científica nin ningún informe en ningún laboratorio do mundo" falara sobre el, e destacou ademais os "estritos protocolos de seguridade" dos que visitaron, entre eles o P4 do Instituto de Virología de Wuhan.
"TODO CONTINÚA SINALANDO AOS MORCEGOS". Tras os seus dez días de investigación da orixe do SARS-CoV-2 sobre o terreo en Wuhan, o especialista danés asegurou que "todo continúa sinalando a unha reserva deste virus, ou dun virus similar, en poboacións de morcegos".
Xa que en Wuhan e na súa rexión non hai colonias de morcegos, explicou, intentaron atopar "outras especies animais que puideron contribuír a introducir o virus" na cidade.
"Non parece que houbese unha gran circulación do virus en ningunha especie animal no país", onde os científicos chineses analizaron miles de especies sen que se puidese identificar a ningunha especialmente portadora, sinalou.
No mercado vendíanse produtos conxelados, "algúns importados", dixo, ademais de animais salvaxes domesticados e produtos elaborados con eles.
"Temos que continuar esta pista, tanto nos produtos conxelados como nos semiprocesados e os crus", recalcou.
Así mesmo, considerou que non hai "grandes evidencias" da transmisión do virus en Wuhan antes de decembro de 2019 e que os primeiros casos na cidade non se deron só no mercado de Huanan, senón tamén "simultaneamente" noutros lugares non relacionados con aquel, cuxo rastro non proporcionou máis pistas.
Por iso, os expertos cren que deben examinarse mostras de sangue noutras provincias de China e noutros países, así como colonias de morcegos en diferentes rexións asiáticas ou incluso noutras partes.
Neste sentido, recalcou que o rastrexo do camiño do virus é aínda un "traballo en curso".
A OMS ESTUDIARÁ A CADEA DE FRÍO. Ben Embarek considerou dúas hipóteses principais como as máis probables para a transmisión do virus ao ser humano: a través dun hóspede animal intermedio ou por medio dalgún alimento conxelado da cadea de frío.
A primeira "é a máis probable e a que requirirá máis estudo e investigación", dixo, pero considerou a segunda igualmente posible, aínda que recoñeceu que aínda non saben moito sobre ela.
"Temos que insistir no estudo da cadea de frío como fonte de transmisión, sabemos que o virus pode aguantar moito tempo, pero aínda non como se transmite, requírese moito traballo aínda para explorar estes camiños interesantes", indicou.
China destacou nos últimos meses a posibilidade de que o virus chegase orixinalmente ao país a través dos alimentos conxelados, nos que detecta con frecuencia, aínda na actualidade, trazas do virus.
Ben Embarek explicou que analizan dúas vías en relación cos conxelados: a chegada do virus ao ser humano a través dun individuo concreto ou por medio dun foco, como o do mercado de Huanan.
O VIRUS PUIDO CIRCULAR ANTES NOUTRA PARTE. Na rolda de prensa, que a OMS celebrou conxuntamente cos seus colegas do país asiático, Liang Wannian, o xefe do equipo de expertos chineses que investigou o SARS-CoV-2, foi un pouco máis aló e asegurou que puido circular noutros lugares antes que en Wuhan.
"Nos dous meses previos a decembro non hai probas de que estivese na cidade", afirmou Liang e destacou que a circulación temperá do coronavirus produciuse varias semanas antes de que se detectasen os primeiros casos, o que "pode explicar o fallo da súa detección noutras rexións" fóra de China.
O epidemiólogo, que exerceu tamén de responsable do equipo designado por China para combater a epidemia, afirmou que a investigación das mostras de sangue e de anticorpos dos pacientes en Wuhan na segunda metade de 2019 "non indican unha actividade temperá do virus na cidade".
Segundo dixo, todas as mostras de produtos animais do mercado de Huanan foron negativas no test realizados, polo que "non é posible determinar como o virus chegou ata alí".
