As autoridades sanitarias chinesas anunciaron a detección do primeiro caso mundial de gripe aviaria H10N3 en humanos.
Nun comunicado, a Comisión Nacional de Sanidade asegura que ata agora nunca se detectou un contaxio a humanos dese virus, que se trata dunha transmisión "accidental" e que o risco dunha propagación a gran escala é "moi baixo".
O paciente é un home de 41 anos da provincia oriental de Jiangsu que o pasado 23 de abril empezou a notar febre e outros síntomas, sendo hospitalizado cinco días despois tras agravarse o seu estado.
A Comisión apunta que o estado do contaxiado mellorou ata o punto de alcanzar os requisitos para ser dado de alta.
As autoridades levaron a cabo seguimentos de urxencia a todos os seus contactos próximos na provincia e non atoparon "anormalidades".
Segundo os expertos, que reiteran que se trata dun caso illado, o virus H10N3 non ten a capacidade de infectar de xeito efectivo a humanos.
A Comisión fixo un chamamento aos cidadáns a evitar o contacto con aves mortas no día a día e a tratar de non achegarse ás vivas tampouco, así como a coidar a hixiene alimentaria e a acudir inmediatamente a un doutor en caso de presentar síntomas como febre ou problemas respiratorios.