A epidemia de gripe aviaria agrávase no suroeste de Francia, ao anunciar este xoves o Ministerio de Agricultura que hai xa 124 focos da enfermidade en granxas avícolas da rexión, deles 119 na zona das Landas, o que supón o dobre que os 61 do pasado día 1.
As Landas, no suroeste do país e moi preto da fronteira española, é con diferenza a zona máis afectada, xa que noutros departamentos do país onde se detectaron aves co virus H5N8 "a situación parece estabilizada", sinalou o Ministerio de Agricultura nun comunicado.
Trátase dunha zona cunha alta concentración de granxas de patos para a industria alimentaria.
Os outros cinco casos detectáronse en departamentos veciños, catro deles na zona pirenaica francesa.
Ante o agravamento da epidemia, o Ministerio anunciou un endurecemento das medidas, entre as que figura o aumento dos sacrificios preventivos, que ata agora afectaron a 350.000 aves de curral.
Ademais, os sacrificios preventivos, que ata agora se realizaban nun radio de 3 quilómetros ao redor dos focos detectados, estenderanse a 5 quilómetros. Para iso, ampliarase o dispositivo de sacrificios, con novas instalacións e máis veterinarios, engadiu o Ministerio.
A enfermidade, transmitida por aves migratorias salvaxes e que con esta variante do virus non afecta ao ser humano, estendeuse de forma extremadamente rápida por Francia, xa que o primeiro foco nunha granxa de patos do suroeste detectouse hai xusto un mes, o 8 de decembro.