O fundador do portal WikiLeaks, Julian Assange, foi detido este xoves na embaixada de Ecuador en Londres, despois de que esta lles autorizase a entrada no recinto e unha vez que o Goberno ecuatoriano decidise retirarlle o asilo, informou unha portavoz de Scotland Yard.
Assange, de 47 anos, entrara na legación diplomática ecuatoriana en 2012 para evitar a súa extradición a Suecia, que entón solicitaba a súa entrega por presuntos delitos sexuais. WikiLeaks confirmou que Ecuador clausurou o asilo político que concedera a Assange, unha decisión que cualificou de "ilegal" e de violación "do dereito internacional".
Nun comunicado, a policía británica sinalou que o xornalista foi apresado en virtude dunha orde de arresto emitida pola Corte de Maxistrados de Westminster (Londres) o 29 de xuño de 2012, cando o australiano decidiu non presentarse ante a Xustiza. O informador e activista foi levado a unha comisaría do centro de Londres antes de presentarse ante a Corte de Maxistrados de Westminster "canto antes", engade a nota.
Estaba refuxiado na embaixada na capital británica desde 2012 para evitar a súa extradición a Suecia
Nun tuit, o ministro británico de Interior, Sajid Javid, dixo que case sete anos logo da súa reclusión na embaixada de Ecuador, podía confirmar que "Assange está agora baixo custodia policial e afronta a acción da Xustiza no Reino Unido". "Quero agradecer a Ecuador pola súa cooperación e á policía metropolitana pola súa profesionalismo. Ninguén está por encima da lei", subliñou.
Pola súa banda, o ministro británico de Exteriores, Jeremy Hunt, afirmou noutro tuit que Assange "non é un heroe", á vez que agradeceu ao presidente ecuatoriano, Lenin Moreno, pola súa cooperación para asegurar que o xornalista afronte a súa responsabilidade ante a Xustiza.
En 2010, WikiLeaks divulgou máis de 90.000 documentos clasificados relacionados con accións militares estadounidenses en Afganistán
A semana pasada, WikiLeaks informara de que Assange ía ser expulsado nunhas "horas ou días" da embaixada de Ecuador. Assange estaba refuxiado na embaixada na capital británica desde 2012 para evitar a súa extradición a Suecia.
A súa petición de asilo a Ecuador produciuse ao termo dun longo proceso de extradición a Suecia nos tribunais británicos e deu comezo a un caso difícil de solucionar, pois o Reino Unido negouse reiteradamente a facilitarlle un salvoconducto que lle permita pór rumbo ao país latinoamericano. En 2010, WikiLeaks divulgou máis de 90.000 documentos clasificados relacionados con accións militares estadounidenses en Afganistán e preto de 400.000 documentos secretos sobre a guerra de Iraq.
Ese mesmo ano comezou a airear uns 250.000 cables diplomáticos provenientes do Departamento de Estado de EE UU. O informático considera que o seu caso ten paralelismo co de Edward Snowden, o exempleado da Axencia Nacional de Seguridade de EE UU (NSA, siglas en inglés) refuxiado en Rusia.
