Polo menos sete persoas morreron tras un ataque con explosivos este xoves no centro de Iacarta, informa o portal de noticias indonesio Rappler.
A Policía precisou que no ataque participaron entre 10 e 14 homes armados, dous dos cales terían falecido tras detonar os explosivos adheridos ao seu corpo, recollen medios locais.
A primeira deflagración produciuse ao mediodía nun posto de policía, reporta a canle local DetikTv, que mostra fotografías recollidas nas redes sociais onde se pode apreciar o corpo de polo menos un oficial prostrado no asfalto.
Tras o estalido iniciouse un intenso tiroteo seguido por máis explosións.
Segundo o diario Kompas, os disparos alcanzaron a varias persoas, polo que o número de vítimas podería aumentar.
A Policía acordoou as rúas contiguas ao centro comercial Sarinah, escenario do ataque, no barrio de Jalan Thamrin, próximo ao palacio presidencial e a oficinas da Onu.
As autoridades pediron á residentes da área que se manteñan nos seus domicilios e se afasten das fiestras.
Indonesia permanecía en alerta por posibles ataques contra as autoridades locais e lugares frecuentados por estranxeiros.
O país islámico máis poboado e onde os musulmáns compoñen o 88% dos seus 250 millóns de habitantes, Indonesia sufriu varios ataques perpetrados por radicais islamitas.
O ataque de maior envergadura rexistrouse en 2002 na turística illa de Bali, e causou 202 mortos, na súa maioría visitantes australianos.