O Ministerio de Defensa de Afganistán informou de que o proxectil estadounidense GBU-43, denominado a 'nai de todas as bombas' e lanzado sobre unha base do grupo terrorista Estado Islámico (EI), acabou coa vida de 94 dos seus membros, entre eles 4 altos cargos.
A nota identificou aos líderes do EI falecidos como Abubakr, Hamza, Shahid Omar e Walkan Isama nunha operación na que ademais foron destruídas catro covas empregadas como refuxio polos combatentes. Tamén caeron varios depósitos de munición dos terroristas, xunto a unha decena de vivendas, que segundo detallou o comunicado, non deixou vítimas civís.
Este foi un punto no que insistiron as autoridades locais de Nangarhar e o goberno de EEUU, xa que segundo a súa versión, a única familia que vivía preto da base do EI foi desaloxada antes do bombardeo. Pola súa banda, o Estado Islámico negou a véspera, que o ataque causase feridos ou mortos entre as súas filas.
O ataque produciuse despois de que o Goberno afgán afirmase esta mesma semana que o número de insurxentes do EI no país é inferior a 400 e que o ano pasado abateu a uns 2.500 membros do grupo, o que reduciu a súa presenza a só dúas das 34 provincias afgás.
