Os equipos de rescate acharon este domingo o cadáver dunha muller sepultado baixo os cascallos do edificio onde este sábado se rexistrou unha forte explosión no centro de París, o que eleva a catro a cifra de vítimas mortais, informaron a Efe fontes da Fiscalía. Ademais desta muller, tamén morreron no suceso unha turista española que se aloxaba nun hotel diante da panadería que sufriu o escape de gas que provocou a detonación, e dous bombeiros que atendían esa fuga, alertados polos veciños.
Minutos antes do achado do cadáver, os bombeiros alertaran de que se buscaba a unha persoa entre os restos. O portavoz dos bombeiros, Eric Moulin, declarou á prensa que os servizos de rescate traballan "a man, levantando pedra por pedra", mentres os cans continúan rastrexando en busca de máis desaparecidos.
O inmoble máis afectado deberá ser reforzado de arriba abaixo, e os veciños non poderán entrar nos edificios próximos ata que os arquitectos confirmen que non sofren danos estruturais que poidan supor risco de derrube.
Unha trintena de bombeiros continúan mobilizados nas operacións e seguirán na rúa Trévise "polo menos 48 horas ou quizá toda a semana".
O Concello de París sinalou nun comunicado que polo momento hai doce edificios aos que non se poderá entrar, como mínimo, nas próximas 48 horas. Ademais, varios inmobles quedaron cortados da rede de subministración de auga, e os vehículos non poderán estacionar nesa rúa ata nova orde polos riscos de que caian cristais.
"Todos os habitantes atoparon unha solución de aloxamento. 38 persoas que necesitaban un aloxamento de urxencia foron recolocados pola municipalidade en hoteis", sinalou a Alcaldía.
