A Policía francesa matou o home armado que tratou de atacar este xoves unha comisaría do barrio da Goutte d'Or, no norte de París , informaron fontes policiais.
O home, que levaba un falso cinto de explosivos e unha arma branca na man, tratou de entrar cara ás 12.00 hora local (11.00 GMT) na comisaría ao berro de "Allahu Akbar" (Alá é grande), e foi tiroteado pola policía.
O corpo do individuo quedou tendido no chan no exterior da comisaría da rúa da Goutte d'Or, ao redor da que se organizou un cordón policial con decenas de axentes.
Outro home que tomara imaxes da actuación das forzas da orde foi detido nas proximidades da zona.
Os artificieiros acudiron para examinar o dispositivo que levaba no corpo o atacante, explicou o portavoz do Ministerio do Interior, Pierre-Henry Brandet, á canle BFM TV.
Brandet, que considerou que houbo "unha reacción perfecta dos funcionarios de policía" que replicaron a tiros á agresión, dixo non ter informacións sobre a presenza dun segundo home no ataque, da que deran conta algúns medios de comunicación, aínda que puntualizou que non se pode descartar ningunha pista".
Tras rexistra o cadáver foi achado un papel cunha bandeira do Estado Islámico (EI) e unha reivindicación escrita en árabe e un teléfono móbil.
Nun comunicado, o Ministerio Público francés explicou que a sección antiterrorista da Fiscalía de París asumiu a investigación polo cargo de "tentativa de asasinato sobre persoas depositarias da autoridade pública en relación cun proxecto terrorista".
"Hoxe ás 11.30 (10.30 GMT), un individuo, portador dunha arma branca de tipo carniceiro e dun dispositivo explosivo falso, presentouse ante a comisaría do distrito XVIII, exhibiu a súa arma e gritou 'allahu akbar' antes de ser abatido polos policías de garda ante a comisaría", sinalou a Fiscalía.
A investigación é levada de forma conxunta pola sección antiterrorista da brigada criminal da prefectura de policía (SAT) e a dirección xeral da seguridade interior (DGSI).
Nunha breve comparecencia ante os medios no lugar dos feitos, o ministro francés do Interior, Bernard Cazeneuve, dixo que, "nun país cun nivel de ameaza extremadamente elevado, as forzas da orde están plenamente mobilizadas".
