Traballadores da administración de Xustiza volveron saír á rúa este martes en Lugo, dentro de convocatorias de ámbito nacional, logo da longa folga que levou a cabo o sector en Galicia hai uns meses.
O Sindicato de Traballadores da Administración de Xustiza (Staj) concentrouse para intentar que o Senado rectifique a nova Lei do Poder Xudicial que se aprobou no Congreso por unanimidade. Esta contempla os municipios como centros de destino únicos -non por xulgados ou seccións, como antes- e unha maior mobilidade por carga de traballo ou outras necesidades obxectivas. No municipio de Lugo, auxiliares, tramitadores e xestores suman uns 180 traballadores, segundo o delegado de Staj, José Luis Buján, aínda que na concentración participou apenas unha ducia. Para o venres está convocada unha xornada de folga.
Tamén este martes, os secretarios xudiciais pararon entre as dez e as doce da mañá para reclamar a retribución correspondente ás novas funcións e responsabilidades que asumiron en 2010, tras unha modificación lexislativa que buscaba descargar de labor aos xuíces e maxistrados. En Lugo, de 32 secretarios, once fixeron servizos mínimos e once secundaron o paro, segundo informou o TSXG. Ademais da reivindicación laboral, os secretarios reclaman a "urxente" modernización da administración de xustiza, coa implantación total da nova oficina xudicial. A protesta foi convocada unanimemente por todas as organizacións de secretarios xudiciais.
