Máis de 300 estudantes dunha decena de centros educativos da provincia de Lugo participaron este ano no programa Educar en Xustiza, unha iniciativa promovida polo Consello Xeral do Poder Xudicial (CGPJ) e o Tribunal Superior de Xustiza de Galicia (TSXG) para que o alumnado coñeza o funcionamento dos órganos xudiciais da comunidade galega.
Os escolares, de entre 14 e 17 anos, foron recibidos por xuíces e xuízas, quen lles explicaron en que consiste o seu traballo e responderon as dúbidas que lles expuxeron. Ademais, asistiron a diversas vistas orais das diferentes xurisdicións, sobre todo Penal e Social, durante as que comprobaron de primeira man en que consisten os xuízos e o papel que desempeña cada un dos intervinientes neles.
Durante as visitas, os maxistrados e maxistradas incidiron en aspectos que poden afectar de forma directa á mocidade, como a violencia de xénero, os delitos que teñen que ver co uso das redes sociais, o acoso escolar, o sexting ou outros relacionados co consumo de drogas. Ademais, explicáronlles conceptos básicos da xurisdición de menores, como os dereitos que lles asisten e o sistema de imposición de penas, así como os seus dereitos e deberes a partir da Lei Orgánica 1/1996, de protección xurídica do menor.
De Lugo municipio participaron nesta iniciativa, entre outros, o colexio Fingoi, que estivo na Audiencia Provincial de Lugo, e o IES Sanxillao, que acudiu ao xulgado do Penal número 2. Tamén visitaron a sede xudicial de Armando Durán os alumnos do CPI Ramón Piñeiro, de Láncara, que estiveron no xulgado de instrución número 3 de Lugo. Dentro do programa Educar en Xustiza tamén se organizaron charlas, como a que levou a cabo no IES José Trapero Pardo, de Castro de Ribeiras de Lea, que versou sobre violencia de xénero e sobre a presenza da muller na carreira xudicial.
O programa levou a cabo en toda a comunidade galega, onde participaron máis de 2.000 estudantes de 60 centros educativos. As visitas e charlas iniciáronse en marzo e retomaranse o próximo curso. Tal e como sinalaron desde o TSXG, poderán participar os centros que formalicen a súa solicitude a través do gabinete de comunicación deste tribunal.
