A Xunta, a través do Instituto Galego de Vivenda e Solo (IGVS), rehabilitou nos últimos doce anos 24 edificios no barrio da Tinería, no centro histórico da cidade de Lugo, o que permitiu a adxudicación de 57 vivendas a novos "veciños" desa zona da capital lucense.
A Xunta fixo esta aclaración despois de que o tenente alcalde de Lugo, Rubén Arroxo, acompañado por outros edís do BNG, visitase este mércores ese barrio da cidade e asegurase que a rehabilitación da Tinería leva máis de 4.000 días paralizada, desde que "o PP regresou ao goberno da Xunta de Galicia".
Precisamente, o delegado territorial da Xunta, Javier Arias, invitou ao tenente de alcalde "a darse un paseo polo barrio, a falar cos seus veciños e a coñecer de primeira man a continua recuperación que está a experimentar esa zona do centro histórico", grazas á iniciativa do Goberno galego.
De feito, Javier Arias recordou que o proceso de recuperación da Tinería foi sempre un dos compromisos da Xunta de Galicia, que desde o ano 2001 investiu máis de 26 millóns de euros na compra, rehabilitación e adxudicación de vivendas nese barrio.
Ademais, quixo recordarlle ao tenente de alcalde que "a posta en valor dos edificios do barrio" non comezou co goberno bipartito na Xunta de Galicia, tal e como afirmaba Arroxo, senón que se iniciou no ano 2001 e, desde entón, foron recuperados 40 edificios, o que permitiu pór a disposición de novos usuarios un total de 96 vivendas e 23 locais comerciais.
"É certo que durante o Goberno bipartito se entregaron varias vivendas, pero tamén o é que eran actuacións que se fixeron co PP no goberno", engadiu, porque foi entón cando se compraron "as casas, se redactaron os proxectos e se levou a cabo a rehabilitación dos inmobles".
Ademais, recordou que están en marcha o proceso para rehabilitar o Pazo de Dona Urraca e a Casa da Torre, nese mesma contorna, sen esquecer que o IGVS segue comprando edificios para a súa posterior rehabilitación, cun investimento previsto que se achega ao medio millón de euros.
