A Xunta pídelle por escrito ao Concello que emende "deficiencias" no polígono de As Gándaras

A conselleira de Medio Ambiente, Ángeles Vázquez, remitiulle unha carta á alcaldesa de Lugo, Lara Méndez, para pedirlle que o Concello emende "unha serie de deficiencias" detectadas no polígono industrial das Gándaras por parte dos empresarios que exercen alí a súa actividade.

Nesa carta, a conselleira explícalle que os empresarios a informaron sobre esas "deficiencias" no transcurso da reunión que esta mesma semana mantivo con eles no mesmo polígono das Gándaras, onde anunciou que en abril se licitará a ampliación dese parque con máis de 33.000 metros cadrados chan industrial, o máis novo e moderno dos que hai na cidade de Lugo.

"Nesa reunión trasladábanme que no polígono existen unha serie deficiencias, talles como problemas de recollida de lixo e subministración de colectores, deficiente sinalización e falta de mantemento dos espazos públicos", precisa na carta.

Tamén informa á alcaldesa nesa misiva da "preocupación" dos empresarios pola "falta de seguridade que teñen nese espazo". Por iso, pídelle que "no ámbito das súas competencias e da colaboración leal e institucional que debe presidir a relación entre administracións", teña "en consideración as demandas" que lle trasladaron os empresarios e que "son de competencia municipal". "Estou convencida", engade, de que serán atendidas "de forma satisfactoria", o que contribuirá a facer de Lugo "unha cidade máis competitiva".