A conselleira de Infraestruturas e Mobilidade, Ethel Vázquez, asegurou este martes que a Xunta está volcada no traballo para conseguir "un novo barrio" na Residencia e que, se o actual Goberno de España non ofrece avances relacionados coa nova comisaría, ocuparán "ese espazo cunha residencia da terceira idade funcional para garantir e contribuír a facer cidade no barrio".
Vázquez confirmou que a proposta da Xunta é ampliar o proxecto e executar un centro integral de saúde, "que vimos de licitar con máis de 12 millóns de euros", e tamén de emprego, "que contarán con equipamentos importantísimos e contribuirá á formación e á promoción".
A conselleira asegurou que a colaboración co anterior Goberno de Mariano Rajoy foi clave "grazas aos importantes acordos que se alcanzaron" e lamentou a "falta de implicación" do actual Executivo, liderado por Pedro Sánchez, "no compromiso acadado para o equipamento da nova comisaría".
Segundo Vázquez, a intención da Xunta é que o actual Goberno traslade "toda a información sobre avances e previsións no que respecta á comisaría, onde non vemos avances porque esa parece ser precisamente a súa previsión, non avanzar".
Ante esta situación, a conselleira apuntou que se non reciben noticias do Ministerio de Interior, a decisión da Xunta será "ocupar" o espazo.
"Se non hai resposta, se entre as previsións do Goberno non figura facer unha nova comisaría, queremos aproveitar o espazo que deixará baleiro para utilizalo en servizos sociosanitarios. En definitiva, ocupalo para ofrecer unha mellor funcionalidade á cidadanía cunha residencia tan demandada por todos que dará unha nova vida ao barrio".
Vázquez apuntou que desde a Xunta está a avanzarse no proxecto grazas "á demolición do antigo hospital Xeral, que rematará en outubro". Ademais, a conselleira insistiu en que esperan que a resposta do ministerio chegue canto antes "para avanzar na residencia".
