A Consellería de Cultura, Educación e Universidade licitou o contrato de mantemento da muralla de Lugo por un período de dous anos e un orzamento de 635.700 euros.
O delegado territorial da Xunta de Galicia en Lugo, Javier Arias, explicou que así se lle dá continuidade, ata 2023, "ao permanente traballo de control e corrección que realiza" a administración autonómica no monumento, dado que "é un dos espazos máis transitados da cidade e esixe dun importante esforzo de conservación".
As empresas interesadas en optar ao contrato teñen de prazo ata o 27 de maio para presentar as súas ofertas
Entre as actuacións previstas figuran a retirada manual da vexetación que se acumula nos seus lenzos e o mantemento e reparación de todos os elementos que conforman a estrutura deste monumento, declarado Patrimonio da Humanidade pola Unesco.
Tamén está prevista a reparación da instalación eléctrica e da luminación, así como unha intervención no pavimento do adarve, debido ao desgaste derivado do "intenso uso", pero tamén dalgún "acto vandálico".
Ademais, a actuación sobre a muralla esténdese tamén, na Praza de Pío XII, aos restos do Domus do Mitreo –o templo dedicado a Mitra que foi musealizado in situ–, que forman parte do conxunto arqueolóxico.
As empresas interesadas en optar ao contrato teñen de prazo ata o 27 de maio para presentar as súas ofertas.
