O delegado territorial da Xunta de Galicia en Lugo, José Manuel Balseiro, informou de que a administración autonómica iniciará de inmediato a formación do persoal municipal que se ocupará de levar o novo auditorio da capital lucense, a pesar de que non ten aínda unha data de apertura prevista.
Tras varios anos coa obra civil terminada, o auditorio contou cun investimento que superou os 20 millóns de euros.
En declaracións aos medios de comunicación, Balseiro precisou que “tras un malentendido” co Concello de Lugo, cinco traballadores da administración local empezarán a formarse a partir do 17 deste mes para facerse cargo das instalacións do novo auditorio.
Precisou que a intención da Xunta de Galicia é comunicarlle este mesmo martes esta circunstancia ao goberno local de Lugo, para que os seus traballadores inicien na data sinalada un curso de formación de sesenta horas lectivas, centrado nas habilidades básicas para manexar os novos sistemas que incorpora o equipamento do auditorio.
Balseiro asegurou que a Xunta de Galicia ten “listo” o auditorio para entregar a súa xestión ao Concello de Lugo, dado que acaba de completar a recepción do equipamento do edificio, que custou algo máis de tres millóns de euros.
