O Goberno galego autorizou a retrocesión do pavillón administrativo da Residencia (a antiga escola de Enfermería) para facer unha nova oficina de emprego e formación.
No que foi escola de Enfermería, a Xunta fará unha oficina de emprego e este xoves autorizou a retrocesión do edificio, tras o acordo alcanzado a semana pasada coa Tesourería Xeral da Seguridade Social, que é a propietaria do inmoble. Agora solicitará a esta unha nova cesión para destinar o edificio a oficina de emprego e poder licitar a rehabilitación, cuxo proxecto está "practicamente rematado", asegura o Goberno galego. Con este fin, as consultas e o centro de día de saúde mental que funcionaban nese lugar xa foron trasladados á Praza de Ferrol hai semanas.
En tanto, a Xunta segue agora á espera da licenza municipal para facer o centro integral de saúde no antigo Materno.
AUTORIZACIÓNS. En tanto, tras semanas de reproches entre a Xunta e o Concello pola falta de licenzas para obras pendentes na cidade e catro días despois das eleccións xerais, este xoves axilizáronse trámites. O goberno local aprobou as licenzas para facer o novo colexio do Sagrado Corazón e para os traballos de conservación e mantemento da muralla.
A licenza do colexio ten un período de execución de 24 meses, xa que o obxectivo é que o novo centro educativo estea en funcionamento no curso 2020-2021. De feito, a Xunta advertiu nas últimas semanas de que se a licenza, que foi solicitada en decembro pasado, non se concedía xa, púñase en risco que o colexio estivese listo nesa data. O atraso debeuse a que o Concello tiña pendente o proxecto de dotación de servizos da parcela, que lle corresponde executar e cuxa obra xa licitou.
O Concello tamén autorizou obras de mantemento na muralla e aplicación de herbicidas, uns traballos que están valorados en 235.000 euros e para os que a Xunta pediu permiso en agosto pasado. Cando, hai unhas semanas, o Goberno galego se queixou da tardanza, a administración local alegou que nunca antes a Xunta pedira permiso para eses traballos, que se realizan anualmente, e que estaba á espera de que achegase o visto e prace ao proxecto arqueolóxico que debía aprobar a Dirección Xeral de Patrimonio.
Segue pendente a licenza para a musealización do túnel achado hai anos no cubo VI da muralla (preto da Rúa Ourense). Neste caso, a disputa vén polo pago de taxas, que o Concello reclama e a Xunta considera abonadas coa obra que fixo cando atopou o pasadizo. O Goberno galego asegura que só falta que o Concello asine un convenio porque os traballos (colocación dun enreixado e de iluminación ornamental) afectarán a terreos municipais.
