Os Orzamentos da Xunta para 2021, que este luns entran no Parlamento de Galicia, contemplan unha partida económica de 5,8 millóns de euros para impulsar o Centro Integral de Saúde que está en obras no barrio de A Residencia e que é o primeiro deste tipo en Galicia.
Está previsto que na primavera de 2022 estea en funcionamento este centro, financiado pola Consellería de Sanidade e executado pola Axencia Galega de Infraestruturas, que depende da Consellería de Infraestruturas e Mobilidade.
Esa partida de 5,8 millóns, unha dos investimentos de maior contía para a capital lucense que figuran nas contas do Executivo autonómico para o ano que vén, supón a metade do orzamento do centro que se está acondicionando no antigo hospital Materno-Infantil.
O Centro Integral de Saúde é o proxecto estrela no barrio de A Residencia, xunto coa residencia para persoas maiores, cuxa construción financiará a Fundación Amancio Ortega para xestionar despois Política Social.
As obras, cun prazo de execución de 20 meses, xa se iniciaron nas semanas previas á declaración do estado de alarma, coa demolición dos anexos que enlazaban o Materno-Infantil co Hospital Xeral, onde se atopaba a cafetería e as urxencias pediátricas, así como da nave situada na parte traseira, onde estaban a lavandería e a central térmica.
A rehabilitación deste inmoble, de máis de 8.000 metros cadrados de superficie distribuídos en seis plantas, ten que respectar a galería da fachada principal, xa que é un edificio de mediados do século pasado que está catalogado.
Nesas seis plantas albergará o Punto de Atención Continuada (PAC), que se atopa actualmente en Fingoi; un centro de saúde, que permitirá oxigenar o da Milagrosa; a unidade de saúde mental e a base das ambulancias do servizo de urxencias 061. Ademais, disporá de espazos para futuros servizos.
O acondicionamento do Centro Integral de Saúde, xunto coas doutros servizos previstos, contribuirá a revitalizar o barrio da Residencia, que notou sensiblemente o peche do vello hospital hai nove anos.
Estas obras suporán ademais un profundo cambio na urbanización do barrio, pois se demolerá o muro perimetral que divide a zona en dúas e crearase un novo acceso que comunicará ambas as partes. Ademais, acondicionaranse zonas verdes e novas prazas de aparcadoiro.
O estado dos diferentes servizos que se porán en marcha nos próximos anos no barrio da Residencia foi un dos asuntos sobre os que virou a reunión que mantiñan hai dez días o presidente da Xunta, Alberto Núñez Feijóo, e a alcaldesa de Lugo, Lara Méndez.
Medio millón de euros para iniciar as obras da planta de biomasa
Dúas caldeiras
As previsións que se fan é que se precisaría unha potencia de 700 quilowatts para dar servizo ao Centro Integral de Saúde, a residencia para persoas maiores, a oficina de emprego e o centro de emprendemento aeronáutico, polo que se estima que bastarían con dúas caldeiras de calefacción. Prevese reservar o espazo para unha terceira, que podería fornecer ás vivendas próximas. Construirase un silo para almacenar 163 metros cúbicos de biomasa forestal, que permitiría unha autonomía dun mes.
Enerxía solar
Contémplase instalar 84 paneis fotovoltaicos para fornecer enerxía eléctrica para autoconsumo da propia sala de caldeiras e incluso no futuro para algún edificio administrativo. Ademais, está prevista a instalación de dous puntos de recarga para vehículos eléctricos.
Accesos
A entrada á sala de caldeiras será pola Rúa Serra de Outes e a carga de pellets pola Rúa Orquídea.
