A Consellería de Infraestruturas e Vivenda asegura nun comunicado que o convenio subscrito no seu día co Concello para a execución das obras da nova ponte de Paradai contempla que o Concello se facía responsable de solicitar todos os permisos e licenzas necesarios para realizar os traballos.
Este departamento da Xunta descarga desta forma no Concello todas as culpas do expediente aberto pola Confederación Hidrográfica do Miño-Sil, que multa a ambas as administracións por construír a rotonda de Serra de Meira sen os permisos necesarios, debido a que afecta a canle do río Rato, á vez que ordena a súa demolición. "A Xunta é obxecto dunha resolución contraria da Confederación Hidrográfica debido ao incumprimento por parte do Concello das súas obrigas", asegura a nota da consellería, que en todo caso considera que existe marxe para a legalización das obras por parte do Concello, o que permitiría evitar a demolición.
O comunicado tamén confirma que, tras coñecer a resolución da CHMS, a Xunta púxose en contacto de forma inmediata co Concello para buscar solucións de forma conxunta. "E por suposto a Xunta e o Concello de Lugo recorreremos de forma coordinada contra esa resolución que entendemos que non está xustificada", explica.
O comunicado engade que as obras executadas para desenvolver o plan Paradai en Lugo "responden a unha demanda moi importante dos veciños e polo tanto o que queremos desde a Xunta é que se superen os problemas de índole administrativo que motivaron a resolución da Confederación Hidrográfica".
OBRA PARADA. A Consellería de Infraestruturas e Vivenda tamén alude á remodelación da Rúa Serra de Meira, outra obra incluída no convenio para a construción da ponte de Paradai e que permanece bloqueada pola CHMS debido a que tamén afecta a canle do río Rato.
Infraestruturas confirma que "hai tamén problemas administrativos que debe resolver o Concello de Lugo" e engade que a Xunta contratou a redacción do proxecto e actualmente ten suspendidos eses traballos ata que se solucionen eses problemas. "En canto sexa así, levantaremos a suspensión e poñerémonos a traballar de novo de inmediato na redacción do proxecto", conclúe a nota.
