A colaboración entre a Xunta e a multinacional norteamericana Boeing permitirá a posta en marcha no outono dunha aula móbil, cuxa primeira localización será Lugo, para "estimular as vocacións científico-tecnolóxicas" entre os alumnos de primaria e secundaria, mediante a formación en áreas como as matemáticas ou a aeronáutica a través da experimentación práctica.
Esa Aula Newton forma parte das actuacións previstas dentro do programa para incentivar as vocacións no ámbito da ciencia e a tecnoloxía da Civil UAVs Iniciative, que a Xunta está a implementar para desenvolver un polo tecnolóxico e industrial centrado nos vehículos non tripulados, con "epicentro" en Rozas e a colaboración dos seus "socios estratéxicos": Indra, Babcock e Boeing.
Anunciouno a directora da Axencia Galega de Innovación (Gain), Patricia Argerey, durante a inauguración na tarde deste luns en Lugo da sétima edición do congreso de Isarra —Sociedade Internacional de Investigación Atmosférica usando Aeronaves Remotamente Tripuladas—, que reuniu uns setenta expertos internacionais no ámbito da instrumentación atmosférica aplicada a drones.
Este encontro, que se desenvolverá entre este luns e o día 23 no Centro de Investigación de Rozas (CIAR) e no campus de Lugo, foi organizado polo Instituto Nacional de Técnica Aeroespacial (Inta), que depende do Ministerio de Fomento.
Durante a súa intervención, Patricia Argerey destacou o compromiso da Xunta co Polo Aeroespacial de Galicia, que conta cun investimento de capital público e privado que ascende a 164 millóns de euros. Tamén subliñou o traballo conxunto que desenvolveu o Goberno galego co Inta para converter Rozas no "centro de investigación e innovación de referencia" no ámbito dos avións non tripulados, co "obxectivo último de crear en Galicia un ámbito de especialización nun sector de intensidade tecnolóxica alta e cun gran potencial de crecemento, como é o sector aeroespacial".
Argerey recordou que actualmente a Civil UAVs Iniciative é a actuación en materia de I+D+i máis importante que puxo en marcha a través de "Compra Pública Innovadora en España", un instrumento no que Galicia é pioneira no ámbito estatal. Recordou, así mesmo, que ademais das tres grandes multinacionais que participan neste proxecto, máis de cincuenta "axentes", entre empresas e centros de coñecemento, teñen contratos asinados para o desenvolvemento desta iniciativa, na que xa traballan 400 persoas e que ten en marcha 35 proxectos en execución.
