O xulgado de instrución número 1 de Lugo concluíu a investigación dunha operación contra o tráfico de droga na que se incautaron máis de 130 quilos de haxix. O seu titular ordena que a causa se siga contra 15 sospeitosos, por se os feitos fosen constitutivos dun delito contra a saúde pública e outro de integración en grupo criminal.
O xuíz considera que se practicaron as dilixencias necesarias "para determinar a natureza e circunstancias dos feitos" e, ademais de ordenar que a causa se siga contra 15 sospeitosos, acordou o sobresemento provisional e arquivo con respecto a oito persoas.
O maxistrado indica no auto, contra o que cabe presentar recurso, que existen indicios da implicación dos sospeitosos na organización que presuntamente se dedicaba ao tráfico de estupefacientes. Eses indicios, segundo explica na resolución, veñen derivados das probas testificais e periciais practicadas, así como das intervencións telefónicas e entradas e rexistro autorizadas polo xulgado, así como seguimentos, vixilancias policiais, balizas de vehículos e intervencións de droga.
Na resolución, o xuíz indica que o investigado que presuntamente dirixía o grupo criminal asentado en Lugo estaba supostamente "integrado nunha organización criminal de maior alcance". Os supostos membros do grupo galego, segundo o auto, repartíronse "roles e funcións para a adquisición, transporte, aprovisionamento e distribución de haxix".
Un dos investigados foi interceptado en 2017 na A-6 no Corgo con haxix
Entre o suposto líder e o seu "subalterno e socio" supostamente organizaron a compra da substancia estupefaciente "planificando as viaxes e captando persoal para transporte e distribuidores na provincia de Lugo".
O instrutor sinala no auto que un dos presuntos compoñentes da organización foi interceptado en maio de 2017 na A-6 á altura do Corgo cando transportaba ocultas na defensa traseira dun vehículo 23 bolsas con landras de haxix, que pesaban 22 quilos.
Dentro da operación, en xuño dese mesmo ano, foron descubertos tamén nunha estrada de Cáceres dous dos investigados, cando portaban 79 quilos de resina de cannabis ocultos nos laterais e nun dobre fondo dunha furgoneta.
Ademais, os axentes que investigaron os feitos comisaron droga nos rexistros practicados nos domicilios dalgúns dos sospeitosos. Nunha das vivendas situada en Lugo incautáronse de 17 quilos de haxix e, noutra, de 18 quilos.
O instrutor decretou dar traslado ao fiscal e ás acusacións acudidas na causa para que no prazo de dez días formulen escrito de acusación no que soliciten a apertura de xuízo oral ou o sobresemento da causa, sen prexuízo de que poidan demandar, excepcionalmente, a práctica de dilixencias complementarias que consideren indispensables.
