Un lucense aceptou na vista celebrada este venres no xulgado do penal número 2 de Lugo unha condena de seis meses e un día de prisión porque lle enviou á súa parella sentimental media ducia de mensaxes de audio por WhatsApp no prazo de catro horas ameazándoa de morte.
Ademais, durante dous anos o procesado non poderá aproximarse a menos de 600 metros da vítima, nin comunicarse con ela a través de calquera medio.
O ministerio fiscal solicitaba inicialmente por este delito de ameazas un ano de prisión, pero rebaixou esa petición á metade tras chegar a un acordo coa letrada do procesado.
Os feitos tiveron lugar en marzo do ano pasado. Nesa batería de mensaxes de audio que lle enviou por teléfono o acusado á súa parella sentimental, díxolle, entre outras frases: "Raposa de merda vouche a arrincar a cabeza", "hai que retorcerche o pescozo igual que a unha puta galiña" ou "eu vou preso, pero ti vas para o cemiterio, que o que mereces é unha bala".
No seu día xa se ditou contra este acusado unha orde xudicial que lle prohibía tanto achegarse a menos de 600 metros como a comunicarse por calquera medio coa súa parella.
