Miércoles. 21.11.2018 |
El tiempo
Miércoles. 21.11.2018
El tiempo

O xulgado adxudica en poxa por 1.500 euros 133 mobles da Cámara

Sede da Cámara de Comercio na Avenida de Ramón Ferreiro. X.PONTE
Sede da Cámara de Comercio na Avenida de Ramón Ferreiro. X.PONTE

O material foi embargado polas débedas contraídas pola entidade con 23 extraballadores

LUGO. O xulgado do Social número 2 de Lugo adxudicou nunha poxa por un importe total de 1.468,94 euros 133 mobles que embargou á Cámara de Comercio de Lugo polas débedas salariais que ten contraídas con 23 extraballadores.

A adxudicataria é unha empresa madrileña que se dedica ao comercio de artigos de oficina. A súa oferta era lixeiramente superior á metade do valor no que estaban taxados estes mobles, que ascendía a 2.908,75 euros.

Trátase de mesas, cadeiras, cadeiras de brazos, sofás, armarios, andeis, mostradores, cajoneras, percheros e un fax e unha impresora que se atopaban nas dúas sedes que tivo a Cámara, a principal da Avenida Ramón Ferreiro e o edificio Forcam de Augas Férreas. A primeira está embargada polos extraballadores e a segunda pasou a mans dunha entidade financeira nunha poxa porque o organismo non puido afrontar un préstamo hipotecario que tiña.

O xulgado está pendente de adxudicar outros nove lotes de mobles e artigos de oficina desta corporación de dereito público porque os 2.538,43 euros que puxo encima da mesa o ofertante madrileño non alcanzan a metade do valor no que están taxados.

Esta instancia xudicial deulle a posibilidade á Cámara de quedar con eles por máis dese importe, pero esta non ten recursos, polo que máis probable é que acabe entregándollos á empresa que puxou por eles.

Tamén segue pendente de ser poxada a sede de Ramón Ferreiro, embargada a instancias dos extraballadores, aos que o organismo debe 2,5 millóns de euros en total en concepto de indemnizacións polos seus despedimentos e soldos pendentes.

Esa poxa pública tense que celebrar por mor de que só un dos 23 extraballadores demandantes opuxésese á adxudicación do inmoble a unha consultora lucense que ofreceu 920.000 euros. Alegou, entre outros argumentos, que o edificio está taxado en máis de dous millóns de euros. Era precisa a unanimidade do persoal para pechar a operación mercantil.

O xulgado adxudica en poxa por 1.500 euros 133 mobles da Cámara
Comentarios