Xuízos sen togas e cos acusados enmascarados, a nova normalidade

A Audiencia Provincial de Lugo decidiu avanzar de fase un pouco máis rápido do que ían marcando as cuestionadas medidas que ata agora foi transmitindo o CGPJ e foi o primeiro tribunal lucense en renovar as vistas presenciais. Fíxoo xa a semana pasada, e este luns sinalou unha por un tema de drogas que ademais serviu como perfecta proba de lume para comprobar ata onde as infraestruturas xudiciais poden estirarse para cumprir coas medidas de seguridade sanitarias: sete imputados chegados de varias localidades de Lugo e doutras provincias galegas, cos seus correspondentes avogados, a representante do ministerio fiscal e os tres maxistrados do tribunal. Non había sitio no estrado para os procuradores nin apenas na bancada para público e prensa. E era unha das maiores salas dispoñibles en toda a provincia.

Nestas circunstancias, dúas novidades da 'nova realidade' chamaban a atención. A primeira, a ausencia de togas: xuíces, fiscal e avogados ían vestidos de rúa, sen os seus habituais uniformes negros, dos que unha instrución do CGPJ os liberou ao principio da pandemia (hai que ter en conta que moitas veces as togas eran compartidas, sobre todo no caso dos avogados e procuradores).

Non menos rechamante era a imaxe dos sete acusados sentados ante o tribunal co rostro cuberto por máscaras. Enfronte, só as levaban un dos xuíces e un avogado, aínda que todo fai pensar que o interese dos imputados por manterse enmascarados estaba máis relacionado con ocultarse das cámaras da prensa que do coronavirus, a xulgar polos sorrisos ao descuberto e a festa que montaron fóra cos familiares que os estaban esperando cando saíron coas súas condenas reducidas.

Na sala, os habituais bancos corridos nos que ben cabían medio centenar de persoas foran substituídos por cadeiras individuais separadas por dous metros, dez en total. Os familiares nin sequera puideron acceder ao hall da Audiencia.