Dous homes con iniciais J.C.M. e A.M.R. serán xulgados no Penal número 1 de Lugo por protagonizar unha pelexa na que utilizaron polo menos un coitelo e un pau de madeira. A vista xa estaba fixada para a mañá deste xoves, pero foi aprazada.
Segundo recolle o ministerio público no seu escrito de conclusións provisionais, o 27 de decembro de 2013, sobre as cinco da tarde, A.M.R. e outro amigo acudiron ao domicilio de J.C.M. e iniciaron unha pelexa, na que os dous acusados se agrediron mutuamente. "Utilizaron ambos un pau de madeira e un coitelo ou navalla, aínda que non consta quen deles portaba inicialmente devanditos efectos", explica o fiscal.
Como consecuencia da disputa, A.M.R. sufriu varias contusións e acabou cunha ferida por arma branca na coxa dereita, na que tivo que recibir varios puntos de sutura. O seu adversario tivo un traumatismo cranioencefálico, hematomas nos ollos, e lesións en xeonllos e brazos.
O fiscal acusa a J.C.M. dun delito de lesións con arma ou instrumento perigoso e solicita para el unha condena de dous anos e medio de cárcere. Ao outro acusado impútalle unicamente unha falta de lesións, que xa estaría prescrita, xa que os feitos ocorreron hai máis de cinco anos.
O ministerio público pide ademais que J.C.M. indemnice o outro home na cantidade de 990 euros polas lesións e o Servizo Galego de Saúde en 1.839 euros pola asistencia médica. Ao outro acusado pídelle que indemnice o seu opoñente en 660 euros e o Sergas en 1.550 euros.
