A xuíza Pilar de Lara aínda non recibiu notificación da resolución da Comisión Disciplinaria do Consello Xeral do Poder Xudicial que lle impón unha sanción de sete meses e un día de suspensión de funcións por unha "falta moi grave de desatención no exercicio das competencias xudiciais".
En declaracións a Efe, o letrado que se fixo cargo da súa defensa neste proceso, Agustín Azparren, explicou que a maxistrada, á que lle foi comunicada a sanción de forma informal a finais de marzo, aínda non recibiu "notificación" desa resolución.
Ante esa situación, recoñeceu que a defensa está á espera de coñecer "a fundamentación" desa resolución para iniciar a redacción do recurso de alzada que presentará ante o Pleno do Consello Xeral do Poder Xudicial.
O letrado aclarou que a maxistrada ten de prazo un mes para presentar ese recurso de alzada, pero o tempo empezará a contar cando lle sexa notificada a resolución da Comisión Disciplinaria.
A suspensión non será executiva, explicou, ata que se vexa esgotada a vía administrativa, e a xuíza aínda podería presentar recurso contencioso-administrativo ante a Sala Terceira do Tribunal Supremo se a resolución do CGPJ non é favorable aos seus intereses.
Se se confirmase a sanción, a xuíza perdería o seu destino e tería que abandonar o Xulgado de Instrución Número 1 de Lugo, que se ocupa de causas como a Operación Pokemon ou o caso Garañón, entre outras.
