Axentes da Policía Nacional adscritos á Brigada de Seguridade Cidadá de Lugo detiveron a un home, veciño da cidade de 42 anos e con máis dunha ducia de arrestos anteriores, por un delito de roubo con violencia. A detención produciuse tras ser interceptado por tres xogadoras do Emevé, que o retiveron logo de ser perseguido por un cliente do bar no que intentou roubar.
Segundo relatou a Policía Nacional, os feitos ocorreron este mércores na zona de lecer do centro da cidade de Lugo, na parte monumental, cando este home entrou nun local de hostalería coa cara tapada e cun gorro na cabeza, onde se dirixiu á camareira, á que avisou de que era un atraco e que lle dese todo o diñeiro que había na caixa.
Neses instantes o atracador deuse conta de que no local había un cliente e saíu precipitadamente do establecemento sen o botín que buscaba. O que non se esperaba é que detrás del fose o cliente.
Entón, a empregada do local avisou á sala do 091 e púxose en marcha un dispositivo de procura e localización do autor dos feitos. Ao mesmo tempo recibiuse outra chamada. Era do cliente que perseguía ao ladrón, que foi narrando aos axentes a través do 091 os lugares polos que ía pasando.
Ao chegar á intersección da rúa Quiroga Ballesteros coa Praza do Ferrol, o heroico cidadán gritou aos transeúntes "ao ladrón". Tres xogadoras profesionais do Emevé que camiñaban pola zona viron a situación e deixaron as pertenzas que levaban enriba no chan para lanzarse detrás do delincuente, ao que interceptaron e retiveron ata a chegada das dotacións policiais.
Na zona do antigo cuartel de San Fernando finalmente foi detido por parte da Policía Nacional o presunto autor da tentativa de atraco.
