O xardineiro dunha das casas situadas ao redor do parque Rosalía de Castro foi atacado sen maiores consecuencias por un exemplar de velutina o pasado luns, o que obrigou aos propietarios do chalé a contratar este martes pola tarde os servizos da firma vivariense Serpa, unha empresa que dedicada á extinción para este insecto.
O seu responsable, José María Vázquez, foi o encargado de exterminar o "niño primario que alí se atopaba". Con todo, non foi capaz de capturar "á raíña, xa que non estaba pola zona", o que mostra indicios de que se esconde nun "niño secundario próximo en plena construción".
Estes insectos, explica Vázquez, teñen unhas "pautas de comportamento marcadas", unha vez que finalizan a creación dun primeiro niño, continúan coa construción dun segundo, de maior tamaño, e así sucesivamente.
Él estivo a revisar a área próxima sen éxito en busca desta nova "ameaza". Ante esta situación asegura que "hai que previr aos veciños", xa que probablemente "haxa un novo avispero nas proximidades".
Vázquez sinala que a intervención realizada en Lugo "foi un procedemento sinxelo", xa que na súa empresa contan cun "equipo e unhas técnicas moi apropiadas". Así mesmo, indica que un dos principais problemas da velutina non é o insecto en si, senón a "escasa formación en prevención para operacións deste tipo", o que ao seu xuízo solucionaríase cunha "maior participación de empresas como a súa nestas funcións".
DA MAN. Aínda así, recordou o "excelente labor que leva a cabo o dos bombeiros", posto que a pesar de contar cun coñecemento limitado do insecto "fan grandes cousas". De todos os xeitos, Vázquez considera que "non é suficiente" e que a mellor alternativa sería que apicultores e exterminadores traballasen da man, cada un ocupándose "da súa parte, pero colaborando mutuamente".
Finalmente, explicou que a súa metodoloxía de exterminación vai "máis aló da simple utilización de líquidos ou produtos", xa que outros factores como a altura ou as cores son igual de importantes.
