Os casos activos baixan en Lugo por segundo día consecutivo, o que confirma a estabilización do virus na provincia. Con datos facilitados este venres e actualizados ata as 18.00 horas do xoves, hai 223 lucenses coa infección activa, tres menos que na xornada anterior, e confirmáronse oito positivos mediante PCR en 24 horas, a mesma cifra que un día antes.
A presión hospitalaria baixa de novo, aínda que por unha mala noticia: o falecemento dun home no Hula con covid-19 diagnosticado. Desta forma, hai seis hospitalizados na provincia, dos que cinco están en planta (catro no Hula e un en Monforte) e un na Uci do hospital lucense.
Desde que comezou a pandemia superaron o virus 12.087 persoas na provincia, tras notificarse 12 altas nas últimas horas, e faleceron con covid-19 diagnosticado 222 lucenses, aínda que o Sergas contabiliza só 214 ao non incluír a algúns cuxo deceso se produciu noutras provincias.
GALICIA. A comunidade rexistrou 195 contaxios por covid-19 nas últimas 24 horas, 30 menos que o día anterior, polo que volve situarse por baixo dos 200 novos casos diarios, cifra superada o xoves tras case unha semana por baixo dese limiar; á vez que reduce a presión asistencial nas Uci.
O descenso de novos contaxios, sumado ás altas, fai caer tamén o número de casos activos, 8 menos, ata 3.064, aínda por encima de tres mil, a un día de que entren en vigor as novas medidas de desescalada tras o fin do estado de alarma, a partir da medianoite do sábado ao domingo.
Segundo o Servizo Galego de Saúde, ata as 18 horas do xoves había nas Uci dos hospitais galegos 45 pacientes, tres menos que o día anterior, mentres que en planta había 152 persoas, tres máis, co que o número total (197) non presenta variacións respecto dun día antes.
Desde o inicio da pandemia faleceron en Galicia 2.393 persoas por covid-19, unha delas notificada nas últimas horas, curáronse 117.917 pacientes e contaxiáronse 123.351.
A taxa de positividade descende case medio punto nesta xornada, ata o 2,5 por cento, tras 7.149 probas PCR no último día, que elevan este tipo de probas a 2.099.117 desde o inicio da pandemia, ás que se suman outras 922.859 serológicas, 2.279 delas nas últimas 24 horas.
Por áreas sanitarias, a de Vigo segue á cabeza por número de infectados (877), aínda que encadea dous días de baixada de casos activos (-20) e de novos contaxios (-12) respecto ao día anterior.
O resto de áreas mantéñense estables, sen cambios significativos, a excepción da área de Santiago, que experimenta un repunte de 13 casos activos e supera os 400 (408) a pesar de rexistrar dous novos contaxios menos por PCR que o día anterior, 22.
