Os propietarios de 20 dos principais restaurantes de Lugo e os seus arredores chegaron a un acordo para adiantar o peche das súas cociñas a partir do próximo luns, unha vez finalizado o Arde Lucus. Todos os días do ano, aínda que sexan festivos ou fins de semana, as cociñas destes coñecidos restaurantes funcionarán ata as 15.30 horas e ata as 23.30 horas e os clientes deberán abandonar o local antes da unha e media da madrugada.
Esta alianza foi subscrita polos restaurantes Anda; Bulló Xantar; Os Cachivaches; Canedo; Il Farabutto; Campos; Casa Paco; Colón; Sabe; Coto Real; España; O Mercado; Mesón de Alberto; Milola; Nadela; A Nosa Terra; La Palloza; Mencía, Mencía; Casa Balbina; Paprica e A Fervenza.
Os seus promotores xa lle comunicaron este acordo de carácter voluntario á Asociación Provincial de Empresarios de Hostalería e Turismo de Lugo (Apehl) para que lla traslade aos demais hostaleiros co fin de que se sume a esta iniciativa.
Todos os mércores desde finais de maio os empresarios desta vintena de coñecidos restaurantes lucenses mantiveron reunións para adoptar este acordo unánime.
Un portavoz deste grupo explica que con este pacto pretenden contribuír a dignificar "a profesión" e a facilitar "a conciliación familiar" tanto dos empresarios como dos empregados.
"Non podemos seguir estando a expensas para pechar da hora á que decida marcharse un cliente", precisa un dos empresarios, que apunta que este acordo pode ser "o xerme para ordenar o sector", algo no que coinciden que é esencial.
Outro dos aspectos que destacaron os asinantes é que se pon de manifesto "a unión que hai no sector da hostalería".