Os veterinarios, un colectivo especialmente presente en Lugo tanto pola importancia do sector primario como pola relevancia da facultade de Veterinaria de USC, viron con resignación como durante toda a xestión da pandemia por Covid-19 as autoridades ignoraron as súas ofertas de axuda: tanto material á hora de pór a disposición as súas PCR e respiradores como de coñecementos e experiencia no control de epidemias. Unha resignación que nos últimos días converteuse directamente en indignación.
Unha das voces que máis se está facendo ouvir neste sentido é a da profesora da facultade de Veterinaria de Lugo Cristina Castelo, que non acaba de entender como se puido ningunear a uns profesionais formados en epidemiología, saúde animal, procesamiento dos alimentos, saúde alimentaria ou medicamento veterinario, con medios para facer probas PCR, respiradores e pantallas protectoras e afeitos a lidar con éxito con epidemias como as vacas tolas, o Sars, a gripe aviaria ou a peste porcina.
NO COMITÉ ALEMÁN. “Existen países, como Alemaña, nos que hai veterinarios no comité de control da pandemia. E na comunidade de Andalucía tamén. Pero no comité de expertos do Goberno non hai veterinarios”, lamenta Cristina Castelo, que é ademais membro das academias de Ciencias Veterinarias de Galicia e de Murcia.
“Non queremos suplantar ningún labor, pero si creo que temos formación para colaborar. Ofrecemos os nosos PCR para facer os test rápidos e rexeitáronse. Tamén as máscaras e as máquinas de osíxeno. E toda foi minimizado e ocultado. Hai laboratorios veterinarios capacitados para facer miles e miles de PCR, pero estamos excluídos totalmente. Espero que sexa por ignorancia, porque se é por mala fe ou por deixamento sería bastante grave”.
Cristina Castelo: "En países como Alemaña si hai veterinarios no comité de control da pandemia de Covid-19"
A proba de que poderían achegar moito máis é que o Laboratorio de Saúde Animal de Lugo foi o elixido pola Xunta como a referencia para analizar o test do Covid-19.
Unha opinión doutra banda, apontoada polo presidente do Consello Xeral de Colexios Veterinarios de España, Luís Alberto Calvo, quen tamén lamentou que o Goberno e outras administracións non contasen con eles a pesar de que desde o primeiro momento deron “un paso adiante” e puxéronse a disposición do Goberno. “Somos a profesión con maior coñecemento de enfermidades zoonósicas e a máis experta na xestión de pandemias”, asegurou o presidente dos veterinarios españois.
O malestar do colectivo, aínda por riba, viuse estes días incrementado por unha broma pasada da raia no programa de humor da TvG ‘Malicia noticias' emitido o pasado día 11. O corte compartiuse polas redes sociais entre veterinarios de toda España e provocou incluso as queixas formais do Colexio de Veterinarios de Lugo, da Federación Estatal de Sindicatos Veterinarios e da Asociación Nacional de Especialistas en Medicamento Bovino.
Aquí un claro ejemplo de la terrible ignorancia de algunos medios de comunicación hacia la profesión Veterinaria. No sólo desconocen su papel en salud pública, sino que además ridiculizan la profesión jactándose de ella.
— Álvaro Mata (@alvar0mata) May 12, 2020
Tenemos un problema, y grave.@MaliciaNoticias ⬅️ pic.twitter.com/wKGfF2rPVc
“O problema co programa, explica Castelo, “é que difundiuse polas redes por toda España e a indignación estendeuse. De feito, a min chegoume desde fóra de Galicia, e iso indignoume aínda máis, porque fai moito dano á imaxe dunha cidade como Lugo, que ten unha facultade de Veterinaria como a nosa. Todos entendemos unha broma nun programa de humor, pero é que iso é outra cousa, é algo denigrante e de moi mal gusto”.
